The Socialist 3

part 3 

لما سألني ليه مش عجباكي ؟ ليه يعني مبتحبيهاش؟
قولتله كده دي وحشة جدا دي مفيهاش باب غير ادام
لو هي عربيتي ، كل ما اكون معدية على صحباتي هاضطر اركن في الشارع عشان اللي قاعدة ادام تنزل و الباقي يركب ورا و ترجع تركب تاني ادام و حواااااار
!!!!
مش بسهولة كده يعني هاعدي و تكون هي واقفة مستنياني اهدي بس تفتح و تركب و نمشي على طول ، لأ ده لاززم ركنة و حوااار !!!
طبعا كل ده كان في دهشة تامة من احمد :)
و انا غالبا مش فاهمة بالظبط ايه اللي مضايقه
و متخيلة ان اللي ضايقه انه بالنسبة له اللي باقوله ده حاجات مش مهمة اوي يعني لدرجة اني ارفض اركب كوبيه او اننا نجيب كوبيه :D
المهم انا كنت باكمل كلامي عادي
قلتله اما بقى لو عربيتك فــ ده معناه ان انا اللي هاتكدر في كل الحياة و كل شوية لما ييجي حد يركب معانا او ينزل من معانا انا اللي هافضل انزل و اطلع كل شوية :( و...... لسة هاكمل
قام قايلي بس بقاااااا
هو انتي هتجيبي العربية عشان تعدي على صحباتك و بتفكري لما تجيبيها ازاي تكون مريحة ليهم :\ هو انتي بتختاريها حسب هتناسب لما تعدي على اصحابك ولا لأ !!!!!
قلتله يا احمد مش الفكرة ! مش الفكرة في انهم هما اللي هيرتاحو او هيتعبو
الفكرة ان انا اللي هاتكدر
قاللي احنا هنجيب العربية لنفسنا !
قلتله بس انا عن نفسي عربيتي لما باحلم و بافكر فيها بيكون عشان اعدي على صحباتي و اخرج معاهم و اجيبهم يعملوا معايا مشاويري و كده و انا معايا عربية بقى اخد الناس معايا في كل حتة و ميكونش ليهم حجة !! :(
هنا طبعا احمد كان هيتشل مني !
و هنا انا وصلت لنهاية الحكاية !
اني يوم عن يوم مبتبسطش الا لو كنت وسط ناس ، و بنعمل حاجة طول الوقت و بنتكلم و مش قاعدين زهقانين خالص !
بالمناسبة دي بقى انا باحب اللعب جداااا وممكن ابقى اكتبلكو بوست جديد عن موضوع اللعب ده بعدين ;)
الخلاصة اني مبحبش ابقى لوحدي ........ ابداً :))))

هما قالولك فين

copied from my facebook profile
بصو بقى
موضوع هما قالولك فين اللي كل الناس بتتريق عليه طول الوقت
و الجملة الأكثر انتشاراً بتاعة "ما هو لو قاللي فين مكنتش سألتك"
لأ يا أمور ممكن يكون قالك فين بس انت مش عارف "فين" ده فين  

بمعنى : انا عايزة اروح عند النوران للصرافة..سألت واحد عليها قاللي معرفش .. انا اتسوحت !
ولا سألت واحد عليها .. قاللي هما قالولك فين؟ قمت قايلاله قالولي جنب اشرف فرغلي ! يقولي اااه هناك كده ع الناصية  ها يا متعلمين يا بتوع المدارس .. انهي احسن؟؟

انا عن نفسي مقتنعة جداً انه سؤال مفيد .. انا عن نفسي من غير ما يسألوني "هما قالولك فين" انا باقولهم لوحدي..هما قالولي عند كذا وارد جداً ميكونش عارف اللي بسأل عليه بس عارف اللي "هما قالولي عليه"

#وجهة_نظر
#أنا_صح :P
#شرح_طويل
#بوست_عميق
#ايش_فهمكم_انتم

فكرو شوية بقى في الحاجة قبل ما تقولوها  — feeling smart.

سيمنار الارتباط "زواج ع الصخر"

فيه نظرية بتقول:
ان ربنا بس اللي هيقدر يشبع كل احتياجاتنا العميقة

و بتقول النظرية ان اهم ٤ احتياجات بتدور حواليهم حياتنا هما: الهوية - الأمان - القبول - الهدف

بمعنى: تحس ان ليك شخصية مستقلة و تلاقي نفسك - تعرف انت عايش ليه..فيه حاجة انت عايش عشانها - تحس ان فيه حد بيحميك - و أخيرا تحس انك محبوب و اللي حواليك محتاجينك

و لما بقى انت متفهمش ان ربنا هو الوحيد اللي في ايده الكلام ده...
و تتخيل ان فيه حاجات تانية كتير ممكن تساعدك انك تلاقي الحاجات دي بتحصل الأزمة الكبييييرة..!

مش كفر منك يعني .. بس انت فاهم ان اه ربنا موجود و بيحمينا و يساعدنا في كل حاجة اوك بس انت بتفكر ان احنا لازم نعيش حياتنا بقى...ومع كل اللي حوالينا .. و ندور ع اللي يبسطنا و يرضينا و نشوف ايه هيشبع احتياجاتنا

الفكرة هي انك بتعتمد اعتماد كبير على موارد تانية...الموارد دي أصلاً زيها زيك..هي مش في اديها كل السبل لارضائك و اشباع احتياجاتك زي ما انت فاكر.

موارد زي مثلاً:
شريك الحياة
الاصحاب- الاهل- الزملاء....الخ
الفلوس
المهنة - الوظيفة
عمل تطوعي
الاطفال
الوالدان
الله
العبادة
او غالبااا خليط منهم او كلهم مع بعض.

فيه ناس مش هتقتنع بالكلام ده و هتقول ما احنا اكيد اه بنلجأ لربنا بس ربنا بيسبب الاسباب و اكيد الحاجات دي سبب في ارضاء احتياجاتنا
هارد عليك و اقولك..امال انت ليه مش مرضي؟؟؟ ليه مش مرتاح؟؟؟؟

النظرية بتقول ... انك لما تتوقع من الشريك او الاصحاب او اي حاجة من اللي فاتو انه هيرضي رغباتك فأنت كده بتظلمه .. و بتحمله فوق طاقته .. و توقعاتك منه دايما هي توقعات غير واقعية

انت مفروض تلجأ لربنا في ده
ربنا هو اللي هيجبلك ال inner peace اللي انت بتدور عليه
هو اللي هيحط جواك الرضا الكامل عن كل حاجة...مش اشخاص ولا فلوس

اعتمادك ع الناس او الأشياء دي .. مش هيأذيهم أد ما هيأذيك انت...لأن النظرية بتوضح تأثير ثقتك الزيادة في شخص او شئ في الحاجات دي:

١- ستكون دوماً محبط من النتائج، بغض النظر عن سير الأمور بشكل جيد من عدمه.
٢- ستفتقر الموارد الداخلية التي تحتاجها لتحب الاخرين بالطريقة الواجبة، و لتواجه الحياة بنجاح.
٣- بشكل دائم تقريبا ستشعر بالألم و الاهانة في نهاية المطاف من الشخص الذي استثمرت كل ثقتك فيه،  لأن هذا الشخص ليس بإمكانه تسديد احتياجاتك العميقة

انا اقتنعت بالكلام ده جدااااً...و ده خلاني كمان افهم ليه مهما حاولت اعمل لأحمد او اسعده هو مبيحسش بالرضا الكاااامل في كل حاجة في حياته...رغم اني مستعدة اعمله اااااي و كــــــل حاجة ترضيه

بس الحقيقة طلعت ان أولاً زي ما قلت: انا اصلا معنديش كل الوسائل اللي اقدر ارضيه بيها ... لا انا ولا غيري...فقط الله
و دي النقطة الثانية..هي ان كل اللي هيريحه و يرضيه مش موجود غير عند ربنا

النظرية بتقول ان الواحد لما مبيلجأش لربنا عشان يلاقي عنده راحته وتلبية احتياجاته هينقل توقعاته اوتوماتيك لأقرب الناس او الموارد المتاحة ليه و غالبا بيكون شريك الحياة هو الشخص ده.

و ملخصين عواقب نقل التوقعات من الله لشخص او شئ اخر في الحاجات دي:

١- بيكون امانك الداخلي معتمد على شخص او شئ لا يمكنك التنبؤ بيه او التحكم فيه، كما انه يتسم بمحدودية موارده في مواجهة احتياجاتك -شفتو..زي ما قلت اهو :-) -
٢- قدرتك على العطاء تعتمد على قدرتك على الأخذ من الاخرين !!!
٣- تمتلئ حياتك بمناخ من الاحباط و خيبة الامل. -صح جداااااا-
٤- توقعاتك الغير واقعية من الآخرين تخلق جواً سلبياً عاماً بالتوتر في علاقاتك، هذا لو لم تخلق قوة طاردة تدفع الآخرين للابتعاد عنك !!!!!!!!!!!!!!

بصراحة اخر نقطة دي هي اللي خلتني اكتب البوست ده كـــــــــــــــــــــــــــله
انتو متخيليييين؟؟؟ الثقة الزايدة في اللي حواليك و الاعتماد عليهم في تلبية كل احتياجاتك و توقع منهم دايماً ارضائك و ان هما اللي في ايديهم سعادتك ... مش بس هيقفلك منهم ..ولا هيحبطك و يجبلك يأس او اكتئاب....لأ ده هيغير في شخصيتك انت شخصياً....مع الوقت هتفقد ثقتك في نفسك تماماً....هتحس انك منبوذ دايماً...و ان مفيش حد بيحبك....
ده هيبدأ بإحساس .. مجرد احساس...ومش حقيقي...لحد ما هيبقى حقيقة فعلا...و فعلا هتبقى الناس مش عايزة تكون معاك ....

و بكل بساطة و اختصار هلخصلكو العكس في جملة واحدة:
الثقة في الله تمنح حياتك مناخ عامر بالبركة و السعادة و التفاؤل و الرضا.....:-)
ربنا هو اكتر حد بيحبك في الدنيا كلها
محدش هيحبك ولا هيساعدك زيه

the socialist 2

قريت بارت 1 فجه في بالي موقف كده لسه حاصل من كام يوم .. قلت احكيلكوا عليه

احمد صاحبي مغرم اووي بالعربيات
طول ما احنا ماشيين عينه ع العربيات .. شفتي دي؟ ايه رأيك في دي؟ تعجبك دي؟
محاولة منه انه يعرف ذوقي مثلاً
يشركني معاه في اهتماماته مثلاً
وات ايفر

المهم ان دايماً ذوقي مبيعجبووش :D
و المعايير عندنا مختلفة و ده طبيعي
لأن انا أصلاً مش باركز ولا بافهم في العربيات يعني

من الاختلافات كمان الجديرة بالذكر ان احمد بيحب ان عربيته يكون لونها ابيض
و انا معترضة جداااااااا على عربية بيضة !!! ايه جو التاكسي ده ؟؟ و ايه الشياكة في كدة؟؟
و ايه المتعة ان واحدة زيي نضارتها مكسورة بقالها شهور و مكسلة تطلع غيرها تفضل تشاورلك كل يوم بالغلط على ان تاكسي
و تبقى السبب في انك تحطها كل شوية في موقف بايخ لما تقرب و تكتشف انك ملاكي عادي بس لونها أبيض :P

المهم ... نرجع لموضوعنا
من الحاجات بقى اللي بنختلف فيها
الـــــــــــكـــــــــــوبــــــــيــــــــــــه
الا و هي العربية اللي ببابين بس -عشان الناس الجميلة زيي اللي مبيفهموش في العربيات-

طبعاً دي حلم من احلام ناس كتير
طبعا دي حاجة روشة و شيك جدا
طبعا العربية الكوبيه بتبقى اغلى من العادية
طبعا كل الكلام ده مش في قاموس "طبعاً" بتاعي انا :)

انا مش باحب العربية دي :\
او عادي يعني مبتفرقش معايا
مش شايفاها حلم .. مش شايفاهها حاجة واو
لو معايا فلوس و الاختيار في ايدي  مش هاجيبها !!!

لحد هنا احمد كان ممكن يتقبل الموضوع عادي
لكن هو ابتدى يتعفرت لما عرف سبب عدم حبي للعربية دي

to be continued

The Socialist

الاجتماعياااااات
كلمة السر
البلوج دي كان ممكن يبقى اسمها ذا سوشياليست :)
انا .... يعني ناس
اهتماماتي .. كلها تتعلق بالبشر
مليش حاجة ابداً باحبها لوحدي

هاوضح اكتر
انا باحب المشاعر .. باحب الحب .. باحب الناس
انا .. أفكاري مش مترتبة....... فطبيعي الكلام يطلع مش مترتب
بس انا طول عمري باكره ابقى لوحدي ... و بازهق جداااااااً لو قعدت شوية لوحدي كده او مش باعمل حاجة بابقى هاتجنن

من صغري و الوحدة از ماي بيجست فير :(
حتى اهتماماتي .. هواياتي .. و اي حاجة بلاقي نفسي فيها او بلاقي متعة و انا باعملها
يا إما بتكون هي أصلاً عبارة عن مجموعة ناس بيعملوا حاجات مع بعض
أو لو هي حاجات فردية فأنا مبعرفش اعملها غير و معايا حد "أو بمعنى أدق مبعوزش" :)
و لما اعملها و معايا حد مقارنةً بـ و انا باعملها لوحدي بتلاقي المتعة متضاعفة

أول حاجة قلتها لأحمد "حبيبي" أول ما عرفنا بعض .. إياك و التجاهل :)
من أهم الحاجات عشان تعرف تتعامل معايا .. متسبنيش لوحدي ... متزعلنيش و تسيبني من غير ما تصالحني
ممكن تشوفوهاا على ان الموضوع مجرد اني عايزة اهتمام بس الحقيقة هي ان كله بيدور حول اني بخاااف جداً من "الوحدة"

من المفارقات الغريبة انكو تعرفوا ان بابايا و مامتي متوفيين !
مامتي متوفية و انا عندي 6 سنين !!
أصغر واحدة في اخواتي اكبر مني بــ 10 سنين !!!
اخواتي كلهم متجوزين و انا عايشة مع اخ واحد...و طبعا كل واحد مننا في حاله و ليه حياته

رغم كل حرصي و تحفظي و خوفي من اني اكون وحيدة .. لكن زي ما انتو شايفين كده........
كل الظروف المحيطة تؤدي إلى طريق واحد-----> الوحدة !!!!

اللي خلاني فكرت اكتب الكلام ده اني بقالي 5 شهور محبطة تماما .. يائسة .. ومعنديش أمل ولا رغبة  في الحياة

اللي ييجي ييجي و اللي يروح يروح مش فااااااارقة اي حاجة
هوانا بس مش عايزة اتألم زيادة الصراحة :( يعني مش اللي يروح يروح اوي :\
بس اللي ييجي ييجي و اللي ميجيش ميجيش

هو الحقيقة مش بس 5 شهور انا محبطة من زمان
بس في اخر 5 شهور بدأت استسلم و تقنعني فكرة الموت
الله لو الواحد مات :)
زمان لأ مكنتش بافكر كده
كان نفسي اوي اتجوز و اعيش حياة معينة و عندي تصور كده لشغلي .. و لشكل مكتبي جوا شغلي
و لنوع العلاقات اللي هاكونها في الشغل
و عربيتي .... و بيتي .. و اصحابي
و حياتي بعد الجواز
و افكاار افكاار احلام و طموحات و اماني
مهما كانت بسيطة "او تافهة من وجهة نظر البعض..والتي لا تعنيني في شئ على الاطلاق" الا انه كان كفاية اصلا انها كانت موجودة

الآن ..لا أخفي عليكو .. انا لا اعيرها اي اهتمام :D
ولا حاجة من دول شاغلة بالي بالقدر الكافي اللي يخليني اعيش عشانها او حتى أسعى لتحقيقها

بس مع كل ده
مانكرش انها لو حصلت انا هابقى سعيدة
مش بس كده .. ده انا اللحظات القليلة اللي بافوق فيها من يأسي شوية باتمنى أوي الحاجات دي
و ده اللي خلاني افكر في الكلام ده

ان انا حتى يوم ما كان عندي طموحات برضه طلعت كلها ليها علاقة بالسوشيال لايف :)
باي ذا واي انا دراستي كان سوسيولوجي :)))))
صدفة والله :) اه كنت باحبها بس مكنتش ركزت فيها و حللت الموضوع فيا أوي كده

كفاية كده انا زهقت هو لسه فيه كلام تاني .. بس ابقى اكتبه في بارت تاني بقى :)

may be..to be continued :)

عن العلاقة 2 :)

كل واحد لازم يبقى على يقين ان مفيش حد كامل .. اه هي فيها عيوب .. بس انا عايزها بعيوبها .. اللي بلاقيه معاها مش هلاقيه مع واحدة مفيهاش العيوب دي :)

 بلاقي معاها النص التاني اللي ناقصني :)


اه هو فيه عيوب .. بس هل عشان أتخلص من العيوب دي مستعدة أتنازل عن كل حاجة حلوة لقيتها و حسيتها و عشتها معاه

لأ لأ مينفعش تاخدي دي و تسيبي دي .. هو باكدج على بعضه

و زي مانتي مستحملة هو كمان مستحمل .. محدش فيكو راضي عن التاني و عن كل صفاته 100%

ده مفيش حد راضي عن نفسه 100% :)

بس الرضا حاجة و الاقتناع حاجة .. لو اقتناعك بيه او اقتناعك بيها اتهز .. برضه محتاجين تفكروا تاني

لو لقيت نفسك بتبذل مجهود عشان تقنع نفسك تكمل معاها يبقى هنا فيه مشكلة .. و كبيرة .. و لازم تقف عنده

عن العلاقة :)

طول ما العلاقات عندنا تعريفها ان الاتنين ياخدوا باسووردات بعض بتاعة أي حاجه 

و الاتنين يمسحوا البنات او الولاد اللي عندهم ..

و تستأذنه و هي خارجة مع أهلها أو يزعقلها عشان خرجت مع اصحابها من غير ما تقوله .. و انها تقلب الدنيا لو لقت لايك من واحدة عنده 

طبيعي مايجيش في بالهم ان فيه حاجات تانيه يتكلموا فيها

زي الثقه و التفاهم و انهم جنب بعض و الحب الغير مشروط و إن لكل واحد مساحته و انهم اكيد في حاجات مشتركة بينهم هيستمتعوا جداً لو عملوها مع بعض و برضه يعرفوا نقط الاختلاف اللي يحاولوا يتجنبوها او يلاقولها حلول :)

طبيعي ان ميبقاش عندهم وقت لــده أصلاً لو كل اللي شاغلهم ياترى هو كلم مين النهاردة .. ياترى هي عملت ايه و مخبية عليا !!

و طبيعي جدا ميبقاش فيه مجال إنها تبقي واقفه جنبه و تساعده و تخفف عنه و لا إنه يقرب منها و يفهمها و يحتويها او انه يشجعها تبقي حاجه كبيره أو تحقق إنجاز
أكبر من كونها بتبعتله تقرير يومي مفصل عن اللي عاوزه تعمله فهو يوافق أو يرفض! 

العلاقات عند ناس كتير مضروبه بالنار .. و بيرجعوا يزعلوا !

الحب تفاهم .. احترام .. حاولوا تستمتعوا بالحب .. اعرفوا انكو مع بعض عشان تسعدوا بعض .. عشان تبقو مبسوطين .. لو لقيتو العلاقة مبتجبش غير وجع القلب .. مبتريحش .. مبتعلوش بعض .. يبقى فيه حاجة غلط .. محتاجين تراجعو نفسكو 

لازم كل حاجة تكون متبادلة ..من طرفين .. مفيش ابداً طرف واحد بس هو اللي على طول غلطان

انتو الاتنين محتاجين بعض .. انتو الاتنين بتكملو بعض ..

لازم تكون فخور بيها .. لازم تكوني فخورة بيه

لو حد فيكو في نظر التاني قليل يبقى انتو حطيتو خط النهاية بدري اوي !!