البداية

ليه عملت ال بلوج أصلاً؟؟ معرفش

فيه حاجات كتير في حياتي باعملها والسبب: برضه معرفش


احتارت جداً في اختيار اسمها ... كــعادتي في كل حاجة

الطبيعي مني هو الحيرة و التردد :) :\

من مشاكلي كمان غير الحيرة و التردد .. هي اني لااازم ارغي .. لازم اتكلم .. لازم اقول كل اللي جوايا 

مابعرفش اسكت..و طبعاً لأن مش دايماً بلاقي اللي اكلمه .. و لو لقيته مش دايماً بيبقى فاضي يسمع..ولو سمع مش دايماً بيبقى هينفع يفهمني :)

عشان كل الحاجات دي بمنتهى السهولة بالجأ للكتابة

شوف يا أخي البنى ءادم .. رغم ان هي الوحيدة اللي بتقف جنبي و بتريحني "الكتابة" الا اني برضه بــكل بجاحة باعترف اني مابجيلهاش غير لما كل الدنيا بتقفل في وشي :) و لو لقيت حد غيرها ارتاح معاه مش هاجيلها

بس الحقيقة ان ده عمره ما حصل .. و الواحد يقول اللي ليه و اللي عليه .. انا مقدرش استغنى عنها ابداً برضه <3

على طول باحتاجها بس مش على طول بتريحني :)

هحاول اني استغنى بالبلوج دي عن النوت بوك .. الفيس بوك .. وكل ورق الكورسات و الحزب اللي مبيسلمش من الشخبطة بتاعتي ومن خواطري اللي منتورة فيه في كل حتة :)

هاكتب هنا كل اللي بافكر فيه اللي بييجي على بالي و اهو اخيراً الاقي حتة واحدة تلم أفكاري اللي مرمية هنا و هناك :)

مذكرات هتلاقي أفكار هتلاقي خواطر هتلاقي 

انت مين أصلاً اللي هتلاقي؟؟ ولا اعرف :)

انا مش باكلم حد معين ومش باكتب ده لحد معين باكتبه لــــنفسي :)

أصلاً لااازم اتعود اعمل حاجات كتيير بس لـــــنفسي :)